श्री अशोक श्रीपाद भांबुरे
अशोक भांबुरे जी यांची कविता अभिव्यक्ती # 235
☆ फसवा गोडवा ☆ श्री अशोक श्रीपाद भांबुरे ☆
☆
काजव्यांनो राज्य तुमचे चालवा
चांदण्यांचा मागतो मी जोगवा
*
अंधकाराचे पडूदे पोपडे
छानपैकी रंग लावूया नवा
*
घातले पाणी तिने वृंदावनी
अंतरी माझ्या फुलावा मारवा
*
संयमाने दाह होता सोसला
दूध झाले तापल्यावरती खवा
*
पाहुनी ओसाड धर्ती विनवतो
या धरेला शालू हिरवा नेसवा
*
सत्व आहे भाकरीतच आजही
बेकरी मालात फसवा गोडवा
*
जीवघेणे धर्म आम्ही पोसले
या सनातन धर्म आता वाचवा
☆
© श्री अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈