श्रीमती मीनाक्षी सरदेसाई

? मनमंजुषेतून ?

☆ ऋतु गाभुळताना… लेखक – अज्ञात ☆ प्रस्तुती – श्रीमती मीनाक्षी सरदेसाई ☆ 

झोपता झोपता दूरदर्शन बातमी देतं..

मान्सून एक जूनपर्यंत केरळ मध्ये दाखल होणार..

मार्च, एप्रिल… २४तास एसी, कुलर, पंख्याला आचवलेलं शरीर.. पहाटे पहाटे पायाशी असलेलं पातळ, चादर, बेडशीट साखरझोपेत कधीतरी अंगावर ओढून घेतं…

… तेव्हा खुशाल समजावं ऋतु गाभुळतोय.

 

ऐटीत झाडावरुन मोहित करणारे बहावा, पलाश, गुलमोहोर…

 वार्‍याच्या खोडसाळपणाने पायाशी पायघड्या पसरवू लागतात. झाडावरचं कैऱ्यांचं गोकुळ रिकामं होऊन गेलेलं, एखादा झाडावरच पिकलेला आंबा, खाली पडून केशर कोय सांडतो. जांभुळ, करवंदाचा काळा, जांभळा रंग जमिनी रंगवू लागतो…

… तेव्हा खुशाल समजावं ऋतु गाभुळतोय.

 

आई-आजीची लोणच्या, साखरंब्याची घाई, कोठीत धान्यं भरुन जागेवर ठेवायची लगबग, गच्ची-गॅलरीत निवांत पहुडलेली चीजवस्तू आडोश्याच्या जागी हलवायची बाबा-आजोबांची गडबड…

… तेव्हा खुशाल समजावं ऋतु गाभुळतोय.

 

ताटातला आमरस सर्रासपणे गोडच लागतो..

साखरेची गोडी त्याला आता नकोशी होते. उरलेल्या पापड, कुर्डया आता हवाबंद डब्यात जाऊन बसतात. डाळ, पन्हं, आईस्क्रीम, सरबतं, सवयीची होत जातात. माठातल्या पाण्यात एखादी भर आताशी कमीच पडते.

… तेव्हा खुशाल समजावं ऋतु गाभुळतोय.

 

दुर्वास ऋषींच्या आविर्भावात आग ओकणारा रवी..

काळ्या पांढऱ्या ढगांशी सलगी करु पाहतो, मेघनभात अडकलेली किरणं सोडवता सोडवता… असाच दमुन जातो. भास्कराचा धाक कमी झाल्याचं पाहुन वारा ही उधळतो. गच्ची, दोरीवरच्या कपडे, गाद्यांवर आता लक्ष ठेवावं लागतं..

… तेव्हा खुशाल समजावं ऋतु गाभुळतोय.

 

निरभ्र वाटणारं आकाश,

क्षणात आभाळ होऊन जातं,

ऊन सावलीच्या खेळात चराचर सावळं होतं.

वीज गडगडाटानं रसपोळीनं सुस्तावलेली दुपार..

धावपळीची होते.

झाडांवरच्या पक्ष्यांची किलबिल, किलबिल न राहता,

नव्या स्थलांतराची भाषा बोलू लागते..

उफाळत्या जमिनीत नांगर फिरू लागतात,

मोगऱ्याचे ताटवे विरळ होऊ लागतात,

मृदगंधाचे वास श्वासात विसावून जातात..

… खुशाल समजावं तेव्हा ऋतु गाभुळतोय.

 

उंबऱ्यावर आलेल्या त्या वर्षेला भेटण्यासाठी 

देहमनाने आपणही आतुरतो….

… तेव्हा अगदी खुशाल समजावं…

…. ऋतु गाभुळतोय… 

 

लेखक : अज्ञात

प्रस्तुती : श्रीमती मीनाक्षी सरदेसाई

संपर्क – ‘अनुबंध’, कृष्णा हॉस्पिटल जवळ, सांगली, 416416.        

मो. – 9561582372, 8806955070.

 ≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

image_print
0 0 votes
Article Rating

Please share your Post !

Shares
Subscribe
Notify of
guest

0 Comments
Inline Feedbacks
View all comments