मराठी साहित्य – चित्रकाव्य ☆– “आयुष्ययात्रा…” – ☆ सुश्री नीलांबरी शिर्के ☆

सुश्री नीलांबरी शिर्के

  चित्रकाव्य  

– “आयुष्ययात्रा…” –  ☆ सुश्री नीलांबरी शिर्के ☆

☆

गोजिरवाणे  बालपण इवले

त्याच्यापुढती बाल्य पहूडले

अगदी थोडे मोठे शैशव

कौमार्याच्या आधी ठाकले ।।

☆

तारूण्याचे रसरशीत पर्ण हे

पूर्ण  वाढीने मोठे जाहले

प्रौढत्वाकडे झुकलेले  जे

पिवळसरपण तयास आले ।।

☆

जरा वय वाढताच पुढती 

सुवर्णाची झळाळी लाभली

इथवर जगण्याची  शरिरी

कृतकृत्यता  तया लाभली ।।

☆

म्हातारपण  येता देहाला

काया सारी शुष्क जाहली

आणि शेवटी सुकता कुडी

इतिकर्तव्यता इथेच झाली ।।

☆

सारे इथेच डोळ्यासमोरी

पर्ण सांगते  जीवनचक्रा

तुमचे, आमचे, त्यांचे, तिचे

अशीच असते आयुष्य यात्रा ।।

☆

जगण्याच्या साऱ्याच अवस्था

मनापासूनी जगून घ्याव्या

पुढती पुढती चालत असता

मागील अनुभव ध्यानी घ्यावा ।।

☆

वळून पाहता येते केवळ

आयुष्यी मागे फिरणे नाही

जी जी अवस्था जे देते ती

कडू-गोड शिदोरी सोबत घ्यावी ।।

☆

© सुश्री नीलांबरी शिर्के

मो 8149144177

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈