मराठी साहित्य – कवितेचा उत्सव ☆ श्री अशोक भांबुरे जी यांची कविता अभिव्यक्ती #225 ☆ वाकळ… ☆ श्री अशोक श्रीपाद भांबुरे ☆

श्री अशोक श्रीपाद भांबुरे

अशोक भांबुरे जी यांची कविता अभिव्यक्ती # 225

☆ वाकळ… ☆ श्री अशोक श्रीपाद भांबुरे ☆

☆

दिशाहीन ही वणवण केवळ

आयुष्याचे झाले वादळ

*

अश्रू करती सांत्वन माझे

डोळ्यांमधले रडते काजळ

*

छोटे मासे आत उतरले

मला गाठता येईना तळ

*

नाही म्हणणे शिकून घ्यावे

आश्वासन ना द्यावे पोकळ

*

रितीच होती रितीच आहे

लेकुरवाळी नाही ओंजळ

*

सभ्य पणाचा मुखडा त्याचा

हुबेहूब तो करतो भेसळ

*

तुझ्या नि माझ्या प्रेमासाठी

दोघांपुरती शिवते वाकळ

☆

© श्री अशोक श्रीपाद भांबुरे