मराठी साहित्य – कवितेचा उत्सव ☆ श्री अशोक भांबुरे जी यांची कविता अभिव्यक्ती #219 ☆ जोखड आहे… ☆ श्री अशोक श्रीपाद भांबुरे ☆

श्री अशोक श्रीपाद भांबुरे

अशोक भांबुरे जी यांची कविता अभिव्यक्ती # 219

☆ जोखड आहे… ☆ श्री अशोक श्रीपाद भांबुरे ☆

☆

जीवन सोपे झालेले पण जगणे अवघड आहे

गायीचा मुडदा पडतो ती होता भाकड आहे

☆

पैशाच्या मोहापायी मज भवती जमले सारे

पण श्वास थांबला नाही दाखवली रोकड आहे

☆

सण आनंदाचा होता उत्साही होते सारे

मी ईद मुबारक म्हणता घाबरला बोकड आहे

☆

खाणीत कोळशाच्या मी अन् तो आहे सोन्याच्या 

मी गुहेत अंधाराच्या का खेळत धुलवड आहे

☆

जीवनदाते जेथे त्या जागेला किंमत येते

श्रावण बाळाच्या हाती सोन्याची कावड आहे

☆

झाडावर जागा होती पिल्लाला रुचली नाही

त्या जुनाट घरट्याचीही झालेली पडझड आहे

☆

शेतात राबतो आहे डोईवर कपास त्याच्या

बैलाच्या खांद्यावरती अजूनही जोखड आहे

☆

© श्री अशोक श्रीपाद भांबुरे