मराठी साहित्य – कवितेचा उत्सव ☆ श्री अशोक भांबुरे जी यांची कविता अभिव्यक्ती #213 ☆ चप्पल… ☆ श्री अशोक श्रीपाद भांबुरे ☆

श्री अशोक श्रीपाद भांबुरे

अशोक भांबुरे जी यांची कविता अभिव्यक्ती # 213

☆ चप्पल… ☆ श्री अशोक श्रीपाद भांबुरे ☆

☆

ही चप्पल पायामधली, बघ काय सांगते आहे

तू रुबाबात फिरताना, ती धूळ चाटते आहे

☆

ती झिजते तुझ्याचसाठी, तू डोंगर चढतो तेव्हा

तू कोचावर बसता ती, दारात थांबते आहे

☆

ती असता नवीन कोरी, तो पसंत करतो तिजला

मापातच असल्यानंतर, ती त्यास भावते आहे

☆

पायात घालण्यापुरती, ही किंमत आहे माझी

का उसवत गेल्यावरती, मी धाप टाकते आहे

☆

तो नवी घेऊन आला, तेव्हाच जाणले मीही

तो टाळत जातो मजला, मी त्यास टाळते आहे

☆

या माझ्या अस्तित्वाला, किंमत कुठलीही नाही

पाहून वेग मी त्याचा, वेगात चालते आहे

☆

मी कोल्हापुरची राणी, बहुमान वाटला होता

पायाची दासी झाले, तो धर्म पाळते आहे

 ☆

© श्री अशोक श्रीपाद भांबुरे