मराठी साहित्य – कवितेचा उत्सव ☆ रंजना जी यांचे साहित्य # 126 – माय माझी ☆ श्रीमती रंजना मधुकरराव लसणे ☆

श्रीमती रंजना मधुकरराव लसणे 

 कवितेचा उत्सव 

☆ रंजना जी यांचे साहित्य # 126 – माय माझी ☆

माय माझी बाई। अनाथांची आई।

सर्वा सौख्यदाई। सर्वकाळ।

 

घरे चंद्रमौळी। शोभे मांदियाळी।

प्रेमाची रांगोळी। अंगणी या।

 

पूजते तुळस। मनी ना आळस।

घराचा कळस। माझी माय।

 

पै पाहुणचार। करीत अपार।

देतसे आधार। निराधारा।

 

संस्काराची खाण। कर्तव्याची जाण।

आम्हा जीवप्राण । माय माझी।

 

गेलीस सोडूनी। प्रेम वाढवूनी।

जीव वेडावूनी। माझी माय।

 

लागे मनी आस। जीव कासावीस।

सय सोबतीस। सर्वकाळ।

 

©  रंजना मधुकर लसणे

आखाडा बाळापूर, जिल्हा हिंगोली

9960128105

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈