मराठी साहित्य – कवितेचा उत्सव ☆ ऊन पावसात नहाते… ☆ सौ.वनिता संभाजी जांगळे ☆

☆ ऊन पावसात नहाते… ☆ सौ. वनिता संभाजी जांगळे ☆

☆

 ऊन पावसात नहाते

माळ मोत्यांची गुंफते

गर्द कोवळ्या वेलींना

जणू चांदणे झुलते || 

*

हिरव्या हिरव्या रानावरी

जणू लखलख चांदणे

लांबसडक गवतावरी

थेंबा थेंबाचे झुलणे ||

*

 ऊन पावसात नहाते

रान सोनपिवळं होते

हिरव्या रानाला जणू

चांदण चाहूल लागते ||

*

 ऊन पावसात नहाते

सरीमागून वेडावते

रंग पोपटी रानभर

झालर रेशमी लागते ||

*

ऊन पावसात नहाते

गंध स्मृतींचा उधळते

श्रावणातल्या झुल्यासवे

मना आठवांचे हिंदोळे ||

☆

© सौ.वनिता संभाजी जांगळे